نسوية| هادية عبد الفتاح تكتب: الرجالة لازم يولدوا

 

فوجئت بصديق ليا مقتنع ان النسويات بيطلبوا ان الرجاله يولدوا! للحظه اتصدمت من الجمله بس لاقيته بيكلم بشكل جدى

وانه فعلا مصدق

الحقيقه فى ناس كتير عندها تصور غريب ان النسويات «فيمنست» دول مجموعة من الستات اللى بيكرهوا الرجالة، وهما لا بيتجوزوا ولا بيعيشوا حياة طبيعية، ومتعصبين لستات، وعايزين الرجالة يولدوا، وبيطالبوا ان الرجالة تكون فى البيوت والستات هى اللى تشتغل، وأن النسويات منحلين اخلاقيا.

النسوية هما مش ناس فى برج عالى و بيطلبوا حاجات غريبه ، بالعكس انت نفسك هتلاقيك اتصرفت تصرفات تدعم النسويه، لما خليت بناتك يتعلموا، لما اديت لاختك ورثها ، وكمان هتلاقى ناس حواليك نسويين وهما مش عارفين اللى رفض يجوز بناته بدرى ، اللى خلوا بناتهم يشتغلوا ، اللى رفضوا يختنوا بناتهم.

كل دول اتصرفوا تصرفات نسويه ، لكن النسويات بيكونوا شايلين الهم اكتر مش بيفكرزا فى حقهم بس لا بيفكروا يوعوا كل البنات والستات ويساعدوهم ياخدوا حقوقهم ،النسويات بينادوا  بعدم السماح بالزواج المبكر  وعدم السماح باجبار أى بنت على الزواج. وبينادوا بوقف الختان وا بيشجعوا البنات والستات انهم يتكلموا لما يحصلهم تحرش و بيطالبول با صدار عقوبات ضد المتحرشين. وبيطالبوا بتشريعات تحمي المرأة، ومساواتها في التعليم والأجور وحق التصرف بمصيرها كاملا وجسدها كاملا. وحرية التنقل والتجوال والملبس.

كمان  النسويات بيوعوا البنات و الستات بحقهم فى العمل  و بيشجعوهم انهم ياخدوا أجوراً مساوية للرجاله  في القطاعات كلها سياسية أو اقتصادية أو اجتماعية.

التسويه عمرها ما نادت باى انحلال اخلاقي ، فى تقديرى انحلال اخلاقي هو اننا نعامل بنات من وهما صغيرين غير الولاد، اننا نعتبر ان البنت ليها شرف متمثل فى حته جلد تدعى الغشاء، و فى المقابل ميكونش للولد اى شرف، لما نسمح ان طفله تتجوز فى سن صغير، الانحلال الاخلاقي هو اللى بنشوفه فى الشارع من تحرش واستباحه اجسام الستات والتعامل دايما معاهم على انهم كائنات اقل درجه من الرجال، النسويه دائما تنادى بالاخلاق فى مجتمع بيستحل اجساد الستات، فى مجتمع بيدى لراجل كل الحقوق ويمنع عن الست اغلب حقوقها.

التعليقات