سحر عبد القوي تكتب: الشاي.. بين الأمر المباشر والطلب


عُمر المشكلة ماكانت في الطلب...المشكلة طول عمرها في صيغة الطلب
مابين الامر الفج المباشر والطلب المؤدب اللي بيتبع بالشكر مساحة كبيرة وفرق شاسع

المشكلة مش في أداء الخدمة المشكلة في الوعي اللي بيحيطها: إحساس اللي بيطلبها إنك بتعمله خدمه ولا احساس انه حق مكتسب انه يتخدم وانك الخدام وانه أرقي وأعلى؟ دة اللي بيفرق.

المشكلة في مساحة الود والحب لو بنحب حد هانعمله مايتمناه واحنا مبسوطين ولو متلككين هانتعصب علي ابسط طلب او كلمة او بدون ولا كلمة

المشكلة في فكرة التبادلية.... انت تخدمني مرة وانا اخدمك مرة موجودة ولا لا؟

المشكلة في توقيت الطلب... انت هتطلب دة امتي وهل انا مستعدة ألبّيلك حاجتك ولا وقتي مش هايسمح والمفروض الآخر يمايز وياخد جمب ويخدم نفسه.

المشكلة ان المحبة انعدمت... والذوق انعدم... والرقي في طريقه للاندثار... والوقاحة مساحتها بتزيد... والارتباط بقا لاسباب غير جوهرية والبقاء عليه لاسباب مادية واهية فالنتيجة اننا بقينا متلككين لبعض

واخيرا كلمة للرجال هز طولك يابن امك واتمشي شوية وقضي حاجاتك ف البيت بنفسك قدر المستطاع لان جيل النهردة من الستات مشحون بقهر اجيال كتيرة سابقة من الستات اللي ماتت م القهر واحنا في زمن reversal of hierarchies بمعني الاوضاع هتتعكس حرفيا وهاتطفحوا الكوتة لو مااتعدلتوش وفكرتوا في المرأة علي انها انسان زيها زيك واكتر حساسية منك كمان

 

*لكل من ترغب في مشاركة الخواطر أو المقالات برجاء التواصل معنا عبر بريد الكتروني: [email protected]

 

 

التعليقات