دعاء نصر تكتب: آدي الربيع

 

شم النسيم شم النسيم شم النسيم، إية اللى ممكن نقوله عن شم النسيم غير إنى عمالة أكرر ف الكلمة.. هوا “آدى الربيع عاد من تانى” زى ما فريد الأطرش بيقول، فيه بنودع الشتا وبنقلع للصيف.

بداية كموظف يعمل فى الحكومة، اليوم ده أجازة فهالولويا ونعمله تعظيم سلام ونقضيه نوم والسلام، أصل الأجازات ده الخير الوحيد اللى ممكن تشوفه من الحكومى، واللى يقولك حرام قوله يا خىّ يعنى هتلاقى حد تعرفه ف الجنة!

شم النسيم كعادة فى بيتنا، فى كل سنة بابا يجيب بصلاية ويصحينا عليها، وأمى تعمل فول نابت، اللى هوا شكل جديد للفول غير المعتاد المدمس والطعمية. سبينا من الاستخدامات المتعددة للفول ونركز فى طبق فول نابت وميته، بابا بيحطله سمن بلدى، أنا بقى بحبه غير، اقعد افصص الفول وعليه عصرة ليمون واشربه مع ميته. وفى أوقات أخرى ورق عنب وهذا الإسم يكفى.

زمان لما كنا صغيرين كنا بنشوف العيال بيلونوا البيض ويرسموا عليه بالفلوماستر، لغاية لما وصلنا أقتراحات نحط كركدية أو شاى فى مية الغلى، وبكدة يبقى عندنا بيض ملون وصحى وبالهنا والشفا. بردو شم النسيم مربوط عندى بالميلانا “حمص أخضر” بنفصصه وناكله.

سالت أبى عن مراسم الاحتفال، قالى لما كان عنده 6 سنين، وقتها كانوا بيهتموا بزراعة الورد. يوم شم النسيم كان بيطلع مع أخته الكبيرة وصحابتها ويروحوا جنينة قريبة من البيت، بالنسبة لستو بقى كان بتشممهم بصل زى ماهوا كان بيعمل معانا وميعرفش أية السبب لدة بردو! وفيه بيض وفول نابت” طب يا بابا والملوحة، “لا، دى ف العيد الصغير”. لما كبر بقى كان بيحاول هوا وأصحابه يروحوا المنيا بالموتسكيلات بس كانوا بيستبعدوا المشوار.

سألت زميلاتى وأحنا مروحين من الشغل عن مظاهر احتفالهم بشم النسيم؟! وسمعت حاجات تفطس من الضحك زى حموم العيال بالليل عشان الشمامة هتشمهم يوم شم النسيم، اللى ينام لبعد الشروق هيبقى كسلان السنة كلها.. أيوة يا صفاء يعنى بتصحوا كام؟ قالتلى على خمسة الفجر كدة. يفضل بردو الفول النابت والبيض وورق العنب، وموضوع شم البصل ده اللى مش عارفين أصله، فاكرين جدتهم لما يكسروا بصلة على عتبة الباب عشان تمنع الأمراض وبصلة تانى يشمها أهل البيت كله. بعدين سألتهم.. هوا ليه كل الطقوس بتعملها الستات فين الرجالة؟! قالوا “بيناموا” كتر خيرهم والله بيتعبوا قوى يعنى!