سحر عبدالقوي تكتب: أنواع الطلاق في مصر

 

 

بشوف علي جروبات بنات كتير مُحبَطة لإنهم ماتجوزوش، وفاكرين إنها نهاية العالم بالنسبالهم. أنا بالبوست دة هاستعرضلهم شوية معلومات اجتماعية عشان يـ take it easy يعني…ويتعاملوا مع العزوبية بسلاسة أكتر من كده.

احنا عارفين إن نسبة الطلاق في مصر 40% طبقا للإحصاءات. يعني كل عشرة من صحباتك اتجوزوا هايطلق منهم 4.. حلو.. وفي ستة لسة متجوزين طيب خلينا نفصص حال الستة اللي لسة على ذمة الجواز دول في مجتمعنا المصري واحنا بنتكلم عن أنواع الطلاق….هو الطلاق أنواع؟؟؟ قطعا أنواع.

أول نوع هو الطلاق العاطفي… ودة بيحصل نتيجة فتور في العلاقة بين الاتنين.. إما انهم تشبعوا من بعض.. أو زهقوا من بعض.. أو اكتشفوا عيوب بعض للآخر وحسوا أنهم كلوا مقلب.. الاتنين بيبعدوا عن بعض، بينفصلوا عاطفيا ثم جسديا….كل واحد بيبقي عايش في العالم الخاص بتاعه هو وبس… وكل واحد شايل هم نفسه وبس والتاني مش عارف الأولاني مهموم بإيه وبيفكر في إيه….ال couple دة غالبا بيكونوا خلفوا أول عيل في خلال أول سنة جواز فبيقرروا يكملوا عشان يربوا العيل دة لحد ماتتحول الحياة بينهم لمستحيلة …. فيطلقوا بعد 5-10-15 سنة أو أكتر أو يكملوا كدة متجوزين منظر بس وبيؤدى واجباتهم تجاه بعض بالعافية

النوع التاني وهو الطلاق الشفهي… بتبقي المدام واخدة يمين طلاق ثم غضبت..ورجعت…ثم التاني…ثم التالت وبقت معاها تلات اربع خمس ست عيال هاتروح بيهم فين؟؟؟ فبتقعد في بيتها…بالعيال…وهو ممكن يكون عايش معاها في نفس البيت علي فكرة والحياة مستمرة بس مطلقين بينهم وبين بعض وقدام العيلتين بس أو بينهم وبين بعض بس…وبيكملوا على كدة لحد ماتفرج من عنده….وبيبقوا قدام المجتمع والقانون couple بيحضروا المناسبات العائلية وبيظهروا علي إنهم جواز مستمر وناجح….

النوع التالت بقا هو اللي بيشكل نسبة ال 40% من حالات الطلاق اللي إما بيطلقوا في صراع محاكم أو بيطلقوا بالتراضي والوفاق وبيتسجل في دفاتر الحكومة إنهم اتطلقوا.

ولو تأملنا الحالات دي بقا هنكتشف إن غالبا 30% من ال 60% اللي مش مطلقين في المجتمع رسمي مطلقين عاطفيا أو شفويا… وقد يكون أن اللي سعدا فعلا في حياتهم لا يتجاوز ال 20% …أنا كدة متفاءلة بزيادة.

أضف كمان ان الازمة الاقتصادية الحالية واللي بتتصاعد وهتتصاعد هتخلي اللي مطلقش يطلق ….عشان الضغط المادي لوحده كفيل بافشال أجمل العلاقات والقصص وتعجيزها….

فعزيزتى السينجل come on and calm down و live your life …انتي مش فايتك كتير يعني…علي الأقل بتتحكمي في نسبة النكد في حياتك …ومش من السهل إن حد يقرفك في عيشتك وربنا ما يوريكي نكد الرجالة في البيوت وأمراض رجالتنا المستعصية على اي محاولة إصلاح أو علاج …يتفاتلهم بلاد…وبناقص ياحبيبتي

وآه بالنسبة للجماعة بتوع عاوزين نخلف…اللي عندهم عيال دلوقتي بيلطموا ومش عارفين هايوكلوهم ويعلموهم ويعالجوهم منين…نعقل الكلام كدة عيال ايه دي اللي يخلفوها في البلد دى..؟ اللي خلف خلف بدري….دلوقتي اللي يعرف يصرف علي نفسه من غير حوجة هايبقي ملك زمانه.